بسم الله الرحمن الرحيم
السلام عليكم ورحمة الله وبركاته..
أشكرك ياشيخ أبو فهد جزيل الشكر على ماتفسره لي من أحلام وعلى ما تبشرني به من بشائر أسئل الله العلي العظيم أن يرزقك علما فوق علمك..

هذا حلم لخالتي ونقلاً عنها حيث تقول:
حلمت بأني كنت في بيتنا وكان البيت حوسة وكأن فيه ترميم , وكان عندنا عزيمة , وكانوا أهلي اللي قاعد واللي يمشي, وقلت لهم بروح أعدل مكايجي ودخلت غرفة وكأنها غرفتي , وكانت الغرفة حوسة وفيها شنط صغيرة وكثيرة ومعظمها لونها أسود, ويوم جيت بـأحط روج لفت نظري شنطة صغيرة سوداء جديدة (يعني لحد الآن سعرها عليها) , ورحت أشوف وش في الشنطة ولقيت فيها رزمة فلوس من فئة 500ريال, وكأنها 100أو200ألف, ويوم جيت أطلع يدي من الشنطة لصقت بيدي فاتورة مشتروات وكان بوسطها 500ريال, وقلت بنفسي بآخذها , وأخذتها, ويوم رجعت عند المراية أعدل مكياجي قلت بنفسي لا حرااام آخذها ورجعتها مكانها, وبعدين اندق باب الغرفة وكان على باب الغرفة واقف سكيورتي (سوري أو لبناني) وطلعت اختي هي اللي عند الباب وجاية بتلبس عندي, ويوم التفت عليها الا هي لابسة فستان جميل جدا جدا وواضح عليه الفخامة وهو دانتيل ولونه وردي على أبيض,وطالعة كأنها ألوان طير حلو, وجسمها كان حلو , وطالعة طويلة, وأنا كنت منبهرة فيها , وقلت لها : مين اللي شاريه لك ؟ قالت: اختي الكبيرة(مع العلم ان اختها الكبيرة هذي متوفية في الواقع ولكنها على قيد الحياة في الحلم), وبعدين جت الشغالة وقالت لأختي ماما أي فستان تبين تلبسينه, وكان الفستان الثاني أحلى من الأول (اللي كانت لابسته), وقلت لها ماشاء الله وش هالفساتين الحلوة ؟ قالت: ايه هذي اختي الكبيرة هي اللي شاريتها لي , وبعدين ناظرت الشنطة وقالت لي جيبي شنطتي, وقلت لها هذي شنطتك قالت . ايه أختي الكبيرة دقت علي وقالت لي تعالي عندي قبل العزيمة عشان في العزيمة بنكون مشغولين , ورحت لها ويوم صلينا العصر رحنا للسوق وشرت لي هالفساتين وعطتني 100ألف , وقلت لها: طيب عطيني من هالفلوس , قالت :لا , وأنا قلت في نفسي ايه أكيد بتعطي اختي الثانية(لأنها في الواقع تعاني من أزمة مادية) , وأصريت عليها تعطيني قالت: خلاص جيبي الشنطة عشان أعطيك, قلت لها لأ أنا بآخذ بنفسي وقمت وفكيت الرزمة وقسمت الفلوس حوالي النص وخذت تقريبا النص, وقلت لها تكفين بآخذها , قالت : خلاص طيب خذيها..
وقمت من النوم..

وجزاك الله كل خير ياأبو فهد وجعله في موازين حسناتك ..