بيتنا..

بسم الله الرحمن الرحيم

السلام عليكم ورحمة الله وبركاته
ارجو تفسير رؤياي الله يجزاك كل خيير..

رأيت كأننا انا وأهلي ساكنين في الخرج محافطة أجدادي وخوالي وعماني.. وكأن بيتنا في أول المحافظه كأنه كان شي رئيسي أو ملفى للناس كأن ابوي كان مثل الشيخ هناك الناس تجيه في مجلسه وتقدره.. واحنا ع الطريق في الليل جايين لهالبيت كان البيت بين المزارع والطريق ضيق ماكان ممهد ويوم وصلنا للبيت كان كبييييير بس قديم وكأن له عمرر ذكرني بقصور الأمراء القديمه اللي تركوها ع حالها وانتقلوا لإحياء جديده... بس داخل البيت كان عادي.. يوم جا اليوم الثاني كأنه كان عيد وكان البيت مليان رجال وحريم وتحديدا الرجال كانوا مررره كثيرين في الحوش... وانا وأمي كنا في المطبخ واشوفهم من باب المطبخ الخارجي اللي يطل عليهم وقلت أوه هذولي نسبانا (آل فلان) اللي هم أهل زوج اختي الابو واخوانه وع ما اعتقد بس مو متاكده أن فيه أهل طليقي رجال فقط لأني مافقدت الا هو فشكل ابوه وأخوه موجودين المهم قلت في نفسي فلان(اقصد طليقي) ماجاء طبعااااا ماله وجه يجي..(زوج اختي وطليقي عيال عم يعني الجماعه وحده) المهم واحنا في المطبخ كانت أمي تزين وتجهز وكانت نفس ايام اول ونشاطها وصحتها.. أخذت صحن معمول وعطتني صحن حلا ودخلت باللي معها ع الحريم وكانت لابسه برقع!!! (مع انها في الواقع تلبس نقاب مو برقع) واقولها يممه صحن الحلا اللي عطيتيني اوديه كذا ولاسمعتني دخلت ع الحريم قلت يووه... كنت افكر احطه في صحن احسن من صحن المحل وكنت اتخيل كأنه ناقص شوي قعدت ادور واحوس في دروج المطبخ علشان أزيده الا فجأة كأن توني اتامل المطبخ كان نظيف و جدييييييييد اعتقد اجدد شي في البيت كله كان لونه ابيض ناصع كله ابيض في ابيض نفس الدرجه الارضيه والجدران والسقف والدروج بس كان على الدروج اللي فوق كل درج عليه رسمه ورده كبيره لونها وردي قاعده اتفكر مع نفسي قلت كيف راحت علينا لو أننا مخلين الجدران لون غير أو ورق جدران فيه وردي بيصير احلى.. الا شوي اشوف من امي من باب المطبخ الخارجي طالعه في الحوش ببرقعها وعليها مثل الجلال نفس نظام البدو اول وبتركب مع احد اخواني في شاص علشان يودونها تسلم ع الناس وتعايدهم... وكان الحوش مليان رجال حتى ما اقدر اطلع هي الوحيده بينهم وسيارات اخواني كانت شاصات ومدري ايش نفس سيارات البدو وأهل البر... قلت في نفس شف راحت وخلتني مع هالحريم بعدين قلت الله واكبر عادي مافيه اجناب مافيه إلا خالاتي وبناتهم وناس نعرفهم وكل شي موجود والخير موجود إذا بغوا شي بيخدمون أنفسهم.. ورجعت اكمل واحوس في إدراج المطبخ علشان صحن هالحلا اللي معي الا جت بنت خالتي (عمرها 38-متزوجه-عندها 3 اولاد-كانت علاقتي معها قويه لكن من تزوجت انا صدمتني بتصرفاتها وخربت العلاقه) واقولها سالفه صحن هالحلا وقعدت تحوس معي في الدروج..

مطلقه من سنتين ونصف
موظفةعمري 27 سنه
عندي ولد عمره 4 سنوات ونصف


الله يعطينا خير هالرؤيا وخير مافيها والله يصرف عنا شرها وشر مافيها..
والله يوفقك ويسخر لك ويجزاك خير

وعليكم السلام ورحمة الله وبركاته
أختي الفاضلة الكريمة يدل مجمل الحلم على أن مل مارأيك هم أرواح عمار منزلكم ومنطقتكم القديمة
وقد تكونين مصابة بروح منها لذلك تتعاون عليك كثير من ذكريات ذلك المكان .
فحصني نفسك جيدا فلن يضرك شيء بإذن الله تعالى
والله تعالى أعلى وأعلم
ونشكر لكم حسن دعائكم لنا ولكم مثله بارك الله تعالى فيكم .